საშემოდგომო კამპანია – “მე ძლიერი ქალი ვარ!”

ლიდერ ქალთა საზოგადოება წარმოგიდგენთ საშემოდგომო კამპანიის მეცხრე ნაწილს, სახელწოდებით – “მე ძლიერი ქალი ვარ!”. გთავაზობთ ახალ, უნიკალურ გამოცდილებას, რომელშიც ყველა ქალბატონის ჩართულობა ფასდაუდებელია და რომელიც მიზნად ისახავს წარმოაჩინოს ქალების მრავალფეროვანი გამოცდილებები, მიღწევები, გამოწვევები და ძალა.

ნინა საგინაშვილი – დერმატო-კოსმეტოლოგი და სასტუმროს მფლობელი

ნინა, პროფესიით დერმატო-კოსმეტოლოგი, საქმიანობას ორი მიმართულებით ეწევა – სილამაზის ინდუსტრიასა და ტურიზმის სფეროში. “მაქვს პატარა ლამაზი სასტუმრო, სადაც ჩემს დამსვენებლებს ვჩუქნი საუკეთესო მოგონებებს საქართველოში მოგზაურობაზე,” – აღნიშნავს ნინა, რომელიც თავის პროფესიულ საქმიანობას “სილამაზის დაბადების” პროცესს ადარებს.

ნინას თქმით, მისი ცხოვრების უდიდესი გამოწვევა ფინანსური დაბრკოლებები იყო, რომელიც სახელმწიფო დაფინანსებით სწავლის შესაძლებლობის წყალობით გადალახა. “ჩემს წარმატებას საფუძვლად უდევს უფლის დახმარება და მებრძოლი სული. ჩემი ყოველი დაცემა და წარუმატებლობა ძალად ვაქციე,” – ამბობს ნინა, რომელიც ახალბედა პროფესიონალებს ურჩევს: “იპოვეთ საკუთარი თავი, არასოდეს არაფრის წინაშე არ დაიხიოთ უკან.” ქალთა პროფესიული განვითარებისთვის ის აუცილებლად მიიჩნევს საბავშვო ბაღების ხელმისაწვდომობის გაუმჯობესებას, სტერეოტიპების დამსხვრევას, რომ “რაღაც ქალის საქმე არ არის” და წარმატებული ქალების ისტორიების გაზიარებას მედიის საშუალებით.

 

ლელა ბუჩაშვილი – ექიმი სტომატოლოგი, რომელიც პროფესიაში სიყვარულს ხედავს

ლელა ბუჩაშვილი, ექიმი სტომატოლოგი (თერაპევტი, ქირურგი და ორთოპედი), პროფესიული გზის უმთავრეს გამოწვევად დასახული მიზნისკენ სწრაფვას და დაბრკოლებების მიუხედავად წინსვლას ასახელებს. მისი ფილოსოფია ეფუძნება საკუთარი შესაძლებლობების რწმენას, მოთმინებას და მუდმივი პროფესიული განვითარების აუცილებლობას.

“ჩემი უნიკალური თვისება გამბედაობაა,” – აღნიშნავს ლელა, რომელიც ცდილობს სრულყოფილად დააბალანსოს სხვადასხვა როლი ოჯახში, პროფესიაში და საზოგადოებაში. მისი რჩევა ახალგაზრდა თაობისთვის არის პროფესიის არჩევა არა მხოლოდ სტატუსის ან ფინანსური სარგებლის გამო, არამედ საკუთარ ღირებულებებთან თანხვედრის საფუძველზე: “როცა შენი საქმე ღირებულებებს ეთანხმება, გაცილებით შორს წახვალ.”

ლელა მიიჩნევს, რომ წარმატებისთვის აუცილებელია ადამიანი იყოს “მოტივირებული, მაგრამ რეალისტი, თავდაჯერებული, მაგრამ თავმდაბალი” და რომ “საწყის ეტაპზე გაჩენილი ეჭვები – ‘შემიძლია თუ არა?’ – ბუნებრივია, მაგრამ სწორედ ამ გამოწვევების დაძლევის რწმენა ხდის ნაბიჯებს მყარს.” ის თვლის, რომ საქართველოში არსებობს მრავალი შესაძლებლობა ქალებისთვის, რომ ჩამოყალიბდნენ ძლიერ, დამოუკიდებელ პროფესიონალებად და თავად გახდნენ შთაგონების წყარო სხვებისთვის.

 

ნათია ნოზაძე – ემპათიით აღჭურვილი ლიდერი განათლებაში

ნათია ნოზაძე, ფილოლოგიის დოქტორი და საზოგადოებრივი კოლეჯ “არსის” დამფუძნებელი და დირექტორი, 2006 წლიდან ხელმძღვანელობს რუსთავში მის მიერ შექმნილ პროფესიულ სასწავლებელს. მისი კარიერის უდიდესი გამოწვევა პროფესიული განათლების სისტემაში ფუნდამენტურ ცვლილებებთან ადაპტაცია იყო, რომელიც ორი პრინციპით გადალახა: “უწყვეტი თვითგანვითარებით” და “პროაქტიული მიდგომით” – ორგანიზაციაზე მორგებული ახალი გზებისა და ინიციატივების დასახვით.

“თუ მხოლოდ ერთ კონკრეტულ თვისებაზე ვისაუბრებ, გამოვყოფდი ემპათიის უნარს. ეს არის ნამდვილი სტრატეგიული აქტივი,” – აღნიშნავს ნათია, რომლის მტკიცებით, ემპათია დაეხმარა მოტივირებული გუნდის შექმნაში და ისეთი გარემოს ჩამოყალიბებაში, “სადაც ადამიანები თავს რეალიზებულად და დაფასებულად გრძნობენ.” ახალგაზრდა ქალებს ის ილიასეულ დევიზს – “მოძრაობა და მხოლოდ მოძრაობა” – ურჩევს, როგორც მუდმივი პროფესიული და პიროვნული განვითარების ინსპირაციას. ნათიას აზრით, ქართველმა ქალმა უკვე “წარმატებით დააბალანსა ოჯახსა და კარიერას შორის არჩევანი,” თუმცა ქალების პროფესიული განვითარებისთვის გადამწყვეტია “პიროვნული მზაობა – მოქნილობა, სტრესთან გამკლავება, პროაქტიულობა და კომფორტის ზონიდან გამოსვლა.”

 

ანა გავაშელიშვილი – დედა, მედიკოსი და მარკეტინგის მენეჯერი

ანა გავაშელიშვილი, 36 წლის სამი შვილის დედა, პროფესიული ცხოვრების ორ მიმართულებას უძღვნის – მედიკანას კლინიკის ოფიციალური წარმომადგენლობის მარკეტინგის მენეჯერია საქართველოში და ამავდროულად ექიმ-კოსმეტოლოგი ინექციონისტი გორში, თამარ ელიზბარაშვილის კლინიკაში. “დედობა და ადამიანობა ჩემთვის ფასეულობათა სათავეა, რასაც ვატარებ როგორც პროფესიულ საქმიანობაში, ასევე ყოველდღიურ ცხოვრებაში,” – აცხადებს ანა, რომელიც თავის პროფესიულ მოწოდებას პაციენტების მხარდაჭერასა და დახმარებაში ხედავს.

“ჩემთვის ყველაზე დიდი გამოწვევა იყო ორი პროფესიის პარალელურად განვითარება და ამასთან ერთად დედობის ვალდებულებებისა და ოჯახის მხარდაჭერის სწორად დაბალანსება,” – ამბობს ანა. მისი თქმით, წარმატების საწინდარი “ადამიანებთან გულწრფელი დამოკიდებულება და ემპათიაა.” ანა ახალგაზრდა ქალებს ურჩევს არ შეუშინდნენ სირთულეებს და “საკუთარი მიზნებისკენ დაჟინებით იარონ.” იგი მიიჩნევს, რომ საქართველოში “ქალებისთვის ყველაზე მნიშვნელოვანი ცვლილება მეტი შესაძლებლობის შექმნაა – პროფესიული განათლების, განვითარების პროგრამებისა და სამუშაო გარემოს კუთხით,” რაც საბოლოოდ “მთლიანად ქვეყნის განვითარებასაც შეუწყობს ხელს.”