ლიდერ ქალთა საზოგადოება წარმოგიდგენთ საშემოდგომო კამპანიის მეთერთმეტე ნაწილს – “მე ძლიერი ქალი ვარ!” ეს უნიკალური კამპანია გახდება სივრცე, სადაც ყოველი ქალბატონის მონაწილეობა განსაკუთრებულია და სადაც ვაღიარებთ და ვზეიმობთ ქალების მრავალფეროვან გამოცდილებებს, წარმატებებს, დაბრკოლებებს და შინაგან სიმტკიცეს.

 

თათია თოდუა – ახალგაზრდა ლიდერი და ტრენერი

 თათია თოდუა აქტიური ახალგაზრდა ლიდერია, რომელიც სხვადასხვა პროექტებსა და ინიციატივებში მონაწილეობს ლიდერობის, ახალგაზრდული ჩართულობის, მედია წიგნიერებისა და გარემოს დაცვის მიმართულებით. პარალელურად, ის ტრენერად მუშაობს და ატარებს ლექციებს დროის მენეჯმენტზე, პროექტის მართვასა და მოზარდთა თვითრეალიზაციაზე. თათიას ასევე ჰქონდა კოლაბორაცია პაკისტანელ მწერალთან და აქტივისტთან ანილა ბუხარისთან.

“ჩემთვის ყველაზე დიდი გამოწვევა იყო პასუხისმგებლობის აღება ჯერ კიდევ ძალიან ახალგაზრდა ასაკში,” – ამბობს თათია, რომელმაც ეს გამოწვევა “თავდაუზოგავი შრომით, თვითგანვითარებითა და მხარდამჭერი მენტორების დახმარებით” გადალახა. მისი თქმით, წარმატების მთავარი საყრდენი რწმენა და ოჯახია, ხოლო უნიკალური სიძლიერე – ორგანიზატორული უნარი: “შემიძლია იდეა გარდავქმნა რეალურ პროექტად, ჩავრთო გუნდი და დავანახო, რომ ცვლილება შესაძლებელია.” ახალგაზრდებს თათია ურჩევს “არასოდეს შეუშინდნენ ქარტეხილებს ცხოვრების გზაზე” და მიიჩნევს, რომ საქართველოში აუცილებელია “მეტი შესაძლებლობებისა და პლატფორმების შექმნა, სადაც ახალგაზრდა ქალებს ექნებათ საკუთარი თავის წარმოჩენის, ცოდნის მიღებისა და კარიერული ზრდის შანსი.”

მადონა ძამუკაშვილი – ფილოლოგი და მშვიდობის ელჩი

მადონა ძამუკაშვილი, პროფესიით ფილოლოგი, თბილისის ივანე ჯავახიშვილის სახელობის სახელმწიფო უნივერსიტეტის კურსდამთავრებული, ამჟამად პროექტ “აფხაზეთი მე ვარ”-ის მშვიდობის ელჩად მოღვაწეობს. მისი კარიერა თბილისის 187-ე ფიზიკა-მათემატიკურ საჯარო სკოლაში დაიწყო, სადაც ქართული ენისა და ლიტერატურის მასწავლებლად მუშაობდა. “მიზნად მქონდა, მოსწავლეთათვის ქართულთან ერთად ქართველობაც მესწავლებინა და მშობლიური ლიტერატურის საგანძური შემეყვარებინა,” – იხსენებს მადონა.

შემდგომში მისი პროფესიული გზა იოანე პეტრიწის სახელობის კერძო სკოლა “იბერიაში” დირექტორის მოადგილედ ადმინისტრაციულ საკითხებში გაგრძელდა. 28 წლიანი პედაგოგიური მოღვაწეობის შემდეგ, როდესაც სკოლამ ფუნქციონირება შეწყვიტა, მადონა აღნიშნავს, რომ მის ცხოვრებაში “რაღაც სიცარიელემ დაისადგურა.” ამ პერიოდში მეგობარმა, ციცი ბეროზაშვილმა, ლიდერ ქალთა საზოგადოებაში ჩართო, რომელიც მადონასთვის “სიკეთის კეთების და ადამიანებისთვის ბედნიერების მინიჭების” პლატფორმად იქცა. ბოლო ოთხი წელია, მადონა ფორმალურად აღარ მუშაობს და ოჯახის საქმეებითა და შვილიშვილების აღზრდით არის დაკავებული. თავისი გამოცდილებიდან, ის რწმუნდება, რომ “ცხოვრება მშვენიერია, ჯერ არაფერი დამთავრებულა და ყველაფერი წინაა.”

 

თათული მაღლაფერიძე – კონდიტერული ხელოვნების ოსტატი

თათული მაღლაფერიძე, 33 წლის კონდიტერ-დიზაინერი ქუთაისიდან და “Tatuli’s Bakery”-ს დამფუძნებელი, ჰობი წარმატებულ ბიზნესად აქცია. პროფესიით ფარმაცევტი, უკვე 10 წელია რაც კონდიტერული ხელოვნებით არის გატაცებული და დღეს საქორწილო და სადღესასწაულო ტორტების ერთ-ერთი გამორჩეული შემქმნელია. “ჰობი ვაქციე საყვარელ საქმიანობად,” – ამბობს თათული, რომელმაც საკუთარი ნიჭი და შემოქმედებითი პოტენციალი სწორედ კონდიტერიაში იპოვა.

“ვარ მაქსიმალისტი და ჩემთვის მნიშვნელოვანია დამკვეთს შეკვეთა დავახვედრო უნაკლო ნამუშევარი,” – აღნიშნავს თათული, რომლისთვისაც ტორტი არა მხოლოდ დესერტი, არამედ ხელოვნების ნიმუშია. წარმატების საფუძვლად ის ოჯახის მხარდაჭერას და პროფესიონალ გუნდთან მუშაობას ასახელებს: “რომ არა ჩემი ოჯახი, მე დღეს ამ ყველაფერს მარტო ვერ შევძლებდი.” მისი მთავარი მოტივაცია “იყო და არის ისევ და ისევ ამ საქმის დიდი სიყვარული,” რაც ეხმარება მას დაძლიოს სირთულეები და მუდმივად ეძიოს ახალი გზები პროფესიული ზრდისთვის. “ლიდერ ქალთა საზოგადოება” თათული მაღლაფერიძეს ნომინაციაში “საუკეთესო კონდიტერი-დიზაინერი – 2025” წარადგენს კონდიტერიის სფეროში გამორჩეული შემოქმედებითი მიღწევებისთვის.

 

ნინო ზურაბაშვილი – პიანისტიდან ფინანსების ექსპერტამდე

ნინო ზურაბაშვილი, პროფესიით პიანისტი, თბილისის სახელმწიფო კონსერვატორიისა და ივანე ჯავახიშვილის სახელობის ხელოვნებათმცოდნეობის ფაკულტეტის კურსდამთავრებული, დღეს Finprio-ს დამფუძნებელია – საკონსულტაციო კომპანიის, რომელიც ბუღალტრებს, იურისტებს, აუდიტორებსა და მარკეტინგის სპეციალისტებს აერთიანებს. “28 წლის ასაკში ძალა მოვიკრიბე, შევიცვალე პროფესია და ბუღალტერიის გზა ავირჩიე. ეს იყო არამხოლოდ ახალი კარიერის, არამედ ახალი ცხოვრების დასაწყისი,” – იხსენებს შორენა.

“ყველაზე დიდი გამოწვევა იყო, დამემტკიცებინა, რომ ქალს შეუძლია იყოს არა მხოლოდ პროფესიონალი, არამედ ლიდერიც ისეთ სფეროებში, სადაც სიძლიერეს ხშირად მხოლოდ მამაკაცებთან აიგივებენ,” – ამბობს შორენა, რომელსაც საკუთარი თავის მიმართ რწმენა არასდროს დაუკარგავს. მისი სიძლიერე “ხედვაა – უნარი, ერთდროულად დავინახო სურათის მთლიანი სიღრმე” და უწყვეტი სწავლის პროცესი. ახალგაზრდა ქალებს ის ურჩევს: “არასოდეს იფიქროთ, რომ თქვენი ადგილი განსაზღვრულია სხვისი სტერეოტიპებით. შექმენით საკუთარი ადგილი!” შორენას მიაჩნია, რომ საქართველოში აუცილებელია “ქალებისთვის შეიქმნას მეტი პლატფორმა ლიდერობის თვისებების განვითარებისთვის,” რაც არა მხოლოდ ქალთა, არამედ მთელი ქვეყნის წინსვლის საწინდარია.