გვანცა გადელია — ქალი, რომელმაც პირადი გამოწვევები სხვების დახმარების ძალად აქცია

 

გვანცა გადელიას პროფესიული გზა გამბედაობის, მუდმივი განვითარების და საკუთარი შესაძლებლობების რწმენის საინტერესო ისტორიაა. იგი ფსიქოლოგია, რომლისთვისაც ადამიანებთან მუშაობა მხოლოდ პროფესიული საქმიანობა არ არის. ეს არის ცხოვრებისეული არჩევანი, რომელიც პირად გამოცდილებას, ცოდნას, თანაგრძნობასა და სხვების დახმარების გულწრფელ სურვილს აერთიანებს. მის ცხოვრებაში არაერთი სირთულე ყოფილა, თუმცა თითოეული მათგანი ახალი შესაძლებლობების აღმოჩენისა და წინსვლის საფუძვლად აქცია.

 

მისი პროფესიული ინტერესები თავდაპირველად ჟურნალისტიკასა და კინოკრიტიკას უკავშირდებოდა. სწორედ ეს ორი მიმართულება იყო მისი პირველი პროფესიული არჩევანი, თუმცა დროთა განმავლობაში მიხვდა, რომ საკუთარი შესაძლებლობების სრულად რეალიზებას ფსიქოლოგიაში შეძლებდა. მისთვის ეს სფერო მხოლოდ თეორიული ცოდნით არ შემოიფარგლება. მიაჩნია, რომ ფსიქოლოგს სჭირდება ცხოვრებისეული გამოცდილება, საკუთარი თავის შეცნობა, ადამიანების ქცევების გააზრება და, რაც მთავარია, თანაგრძნობის უნარი. დღეს ყველაზე დიდ პროფესიულ ბედნიერებას იმ ადამიანების მადლიერება ანიჭებს, რომლებიც მასთან სესიების შემდეგ საკუთარ ცხოვრებაში დადებით ცვლილებებს გრძნობენ.

 

პროფესიულ საქმიანობაში მნიშვნელოვანი ეტაპი 2019 წელს დადგა, როდესაც მენტალური ჯანმრთელობის ცენტრის ერთ-ერთი თანადამფუძნებელი გახდა. ეს იყო შესაძლებლობა, საკუთარი ხედვა პრაქტიკულ საქმიანობად ექცია და ადამიანებისთვის საჭირო მომსახურება შეეთავაზებინა. თუმცა 2020 წელს, პანდემიის პერიოდში, ცენტრის დახურვა მოუწია. ამავე დროს მის ცხოვრებაში სხვა მძიმე მოვლენებიც განვითარდა . სწორედ მაშინ გადაწყვიტა, რომ გარემოებებთან ადაპტაცია და მოქმედების ახალი გზების მოძიება აუცილებელი იყო. დაიწყო ონლაინ საქმიანობა და პაციენტების დისტანციურად მიღება. თანდათან განავითარა საჯარო გამოსვლებისა და სამოტივაციო შეხვედრების მიმართულებაც. დღეს მუშაობს ემიგრანტებთან, ატარებს ვორქშოფებს, საქმიანობს კლინიკაში, თანამშრომლობს სხვადასხვა ორგანიზაციასთან და საკუთარი გამოცდილებით ცდილობს ადამიანებს ცხოვრებისეული გამოწვევების დაძლევაში დაეხმაროს. გამოცემული აქვს ორი წიგნი, ხოლო მისი პროფესიული საქმიანობა მუდმივად ახალი მიმართულებებით ფართოვდება.

 

მისთვის განსაკუთრებული მნიშვნელობა აქვს განათლებასა და საერთაშორისო გამოცდილებას. შესაძლებლობა ჰქონდა, გაევლო ჰარვარდისა და ლონდონის უნივერსიტეტის კურსები ფსიქოლოგიის მიმართულებით. უცხოელ სპეციალისტებთან ურთიერთობამ და განსხვავებულ საგანმანათლებლო გარემოში მიღებულმა გამოცდილებამ კიდევ უფრო გაუფართოვა პროფესიული ხედვა. ამ პროცესში მნიშვნელოვანი როლი შეასრულეს მენტორებმა და ლექტორებმა, რომელთა რჩევებს დღემდე განსაკუთრებული მადლიერებით იხსენებს. ერთ-ერთი ლექტორის სიტყვები მისთვის ცხოვრებისეულ მოტივაციად იქცა: „მეორედ გვანცად ვეღარ დაიბადები, ამიტომ ერთი შანსი გაქვს და შენზეა დამოკიდებული, როგორ გამოიყენებ მას“. სწორედ ამ დამოკიდებულებით ცდილობს თითოეული შესაძლებლობის მაქსიმალურად გამოყენებას.

 

პროფესიულ განვითარებასთან ერთად განსაკუთრებულ მნიშვნელობას ანიჭებს საზოგადოებრივ საქმიანობასაც. თანამშრომლობს არასამთავრობო ორგანიზაციებთან, მონაწილეობს სხვადასხვა საგანმანათლებლო და სამოტივაციო შეხვედრაში და აქტიურად არის ჩართული ძალადობის მსხვერპლი ქალების დახმარების მიმართულებით. მისთვის განსაკუთრებით ღირებულია შესაძლებლობა, საკუთარი ცოდნითა და გამოცდილებით მხარი დაუჭიროს ადამიანებს, რომლებსაც ცხოვრების რთულ ეტაპზე მხარდაჭერა და ახალი პერსპექტივის დანახვა სჭირდებათ. სწორედ ასეთ საქმიანობაში ხედავს საკუთარი პროფესიის ყველაზე მნიშვნელოვან დანიშნულებას.

 

მისი ინტერესები ფსიქოლოგიის ფარგლებსაც სცდება. მუდმივად ეძებს ახალ ცოდნას, სწავლობს უცხო ენას და პროფესიული განვითარების სხვადასხვა პროგრამაში მონაწილეობს. მიღებული აქვს ოცამდე სერტიფიკატი და ახლახან ნუმეროლოგიის კურსიც დაასრულა, რომლის ფსიქოლოგიასთან დაკავშირების შესაძლებლობების შესწავლაც სურს. განსაკუთრებული გავლენა მოახდინა რუდოლფ შტაინერის ნაშრომმა „ფილოსოფიური ალმანახი“, რომლის გამარტივებულ ვერსიაზე მუშაობაც დაიწყო. ასევე ხშირად უსმენს TED Talks-ის გამოსვლებს, რადგან განსხვავებული გამოცდილებებისა და იდეების გაცნობა მისთვის მუდმივი შთაგონების წყაროა.

 

ადამიანებთან ყოველდღიური მუშაობის მიუხედავად, კარგად აცნობიერებს პირადი სივრცისა და შინაგანი ბალანსის მნიშვნელობას. მიაჩნია, რომ პროფესია ადამიანის ხასიათსა და ცხოვრების წესზეც ახდენს გავლენას, განსაკუთრებით მაშინ, როდესაც მას დღის მნიშვნელოვან ნაწილს უთმობს. სწორედ ამიტომ ცდილობს, პროფესიული პასუხისმგებლობა პირადი ურთიერთობებისგან გამიჯნოს. მედიტაცია ფიქრების მართვაში ეხმარება, ხოლო პირადი საზღვრების პატივისცემა საშუალებას აძლევს, ადამიანებს მაშინ დაეხმაროს, როდესაც მათ ეს სჭირდებათ, და ოჯახის წევრებთან ურთიერთობაში ფსიქოლოგის როლის ნაცვლად ახლობელი ადამიანის ადგილი შეინარჩუნოს.

 

სამომავლო გეგმებიც პროფესიულ განვითარებასა და ადამიანებისთვის ახალი შესაძლებლობების შექმნას უკავშირდება. სურს, კვლავ გახსნას ფსიქოლოგიური ცენტრი და დააფუძნოს საკუთარი საგანმანათლებლო სკოლა, სადაც მსურველებს თეორიულ ცოდნასთან ერთად პრაქტიკულ გამოცდილებასაც გაუზიარებს. მისი მიზანია ისეთი სივრცის შექმნა, რომელიც ადამიანებს საკუთარი თავის უკეთ შეცნობაში, პიროვნულ განვითარებასა და შესაძლებლობების რეალიზებაში დაეხმარება. ამასთან, გეგმავს ახალი წიგნის გამოცემას და მუშაობის ახალი მიმართულებების განვითარებას.

 

წარმატებას საკუთარი საქმის ლიდერობასა და მუდმივ წინსვლაში ხედავს. მისი აზრით, ადამიანს უდიდესი შინაგანი რესურსი აქვს, თუმცა ამ შესაძლებლობების აღმოჩენას ხშირად სწორედ ცხოვრებისეული სირთულეები უწყობს ხელს. საკუთარი გამოცდილებით ისწავლა, რომ ყველაზე რთულ პერიოდშიც შესაძლებელია ახალი გზის პოვნა, თუ ადამიანი მზად არის ცვლილებებისთვის, საკუთარ თავზე მუშაობისა და პასუხისმგებლობის აღებისთვის.

 

გვანცა გადელიას ისტორია გვახსენებს, რომ ზოგჯერ ყველაზე დიდი პროფესიული ძალა სწორედ იმ გამოცდილებიდან იბადება, რომელმაც ოდესღაც თავად გაგვიჭირდა ცხოვრება. მან შეძლო პირადი გამოწვევები ცოდნად, გამოცდილებად და სხვების დახმარების შესაძლებლობად ექცია. დღეს მისი მთავარი გზავნილიც ამ დამოკიდებულებას ეფუძნება: არასოდეს არის გვიანი საკუთარი თავის შეცნობა, ახალი გზის არჩევა და ცხოვრების უკეთესობისკენ შეცვლა. მისთვის ფსიქოლოგია მხოლოდ პროფესია აღარ არის. ეს ცხოვრების წესია, რომლის მთავარი ღირებულება ადამიანების მხარდაჭერა, მათში იმედის გაღვივება და საკუთარი შესაძლებლობების რწმენის გაძლიერებაა.