ლიდერ ქალთა საზოგადოებამ ნომინაციაში “წარმატებული მეწარმე ქალი – 2025” წარადგინა ნარგო ბექირიშვილი

ქალთა მეწარმეობის განვითარების კვალდაკვალ, დღეს გვსურს გაგაცნოთ ნარგო ბექირიშვილი – წარმატებული მცირე მეწარმე, რომელმაც საკუთარი ჰობი მომგებიან ბიზნესად აქცია.

საყვარელი საქმიდან ბიზნესამდე

ნარგო ბექირიშვილი, ონლაინ ბუტიკის მფლობელი, აღნიშნავს, რომ მისი ბიზნესი საყვარელი საქმიანობიდან დაიბადა. “ყოველთვის მაბედნიერებდა შოპინგი, განსაკუთრებით ონლაინ სტილის. აქედან გამომდინარე მარტივად გაჩნდა მოსაზრება, რომ ამ საქმიანობის ბიზნესად ქცევა ყველაზე კარგად გამომივიდოდა,” – ამბობს ნარგო.

მისი სამეწარმეო გზა განსხვავებულია იმით, რომ მან უკვე არსებული გამოცდილება და ინტერესი ბიზნეს შესაძლებლობად გარდაქმნა. “გამოცდილება უკვე დიდი მქონდა, როცა საქმე დავიწყე, ამიტომაც ყველაფერი მარტივად დაიწყო და დღემდე ასე მარტივად ვითარდება,” – აღნიშნავს ის.

 

გამოწვევები და წარმატებები

თუმცა, ნარგოს გზა ყოველთვის მარტივი არ ყოფილა. დაახლოებით სამი წლის წინ მის ბიზნესს სერიოზული დარტყმა მიადგა, როდესაც მრავალრიცხოვანი გამომწერებით სავსე ბიზნესგვერდი გაუტეხეს.

“დავკარგე აუდიტორია, დავკარგე მომხმარებლები და უბრალოდ გავქრი ონლაინ სივრციდან. მომიწია ყველაფრის თავიდან დაწყება, რადგანაც ონლაინ სივრცისა და მომხმარებლებთან კომუნიკაციის გარეშე ამ ბიზნესის მართვა ძალიან რთულია,” – იხსენებს ნარგო.

თუმცა, ამ გამოცდილებამ მას მეტი მოტივაცია და შემართება შესძინა. “ამ შემთხვევამ მეტად გამაძლიერა და იმაზე მეტად შემართებით შევუდექი საქმიანობას, ვიდრე მანამდე. ვისწავლე, რომ როცა დაეცემი, აუცილებლად უნდა წამოდგე და განაგრძო გზა.”

უნიკალური მიდგომა

ნარგოს ბიზნესი გამოირჩევა მომხმარებლებთან ურთიერთობის განსაკუთრებული ფორმით. “ჩვენ გვაქვს ურთიერთობის ერთ-ერთი საშუალება ‘ლაივ ჩართვა’, სადაც ჩვენთან ერთად ყოფნა ერთგვარი თერაპიაცაა,” – ამბობს იგი. ამ ლაივ სესიებში, გარდა გაყიდვებისა, იმართება უამრავი გათამაშება და ხდება სიმბოლური საჩუქრების გადაცემა, რაც ქმნის დადებით და ერთობლივ გამოცდილებას მომხმარებლებისთვის.

საზოგადოებრივი პასუხისმგებლობა

ნარგო აქტიურად იყენებს თავის პოზიციას დადებითი ცვლილებებისთვის. “ყოველ დღესასწაულს ვიყენებ იმისთვის, რომ გავაბედნიერო უამრავი ადამიანი და გადავცე საჩუქრები, გავაკეთო ფასდაკლებები. ვატარებთ საქველმოქმედო ლაივებს და ვეხმარებით საჭირო დროს საჭირო ადამიანებს,” – ამბობს იგი.

 

წარმატების საზომი

ნარგოსთვის წარმატება სცდება მატერიალურ მხარეს. “მთავარი წარმატება არის, როცა გრძნობ, თუ როგორ უყვარხარ უცხო ადამიანებს, რომლებმაც ამ საქმიანობით შემიყვარეს. წარმატებაა, როცა გრძნობ, თუ როგორ აბედნიერებ უცხო ადამიანებს და წარმატებაა, როცა აცნობიერებ, რომ საზოგადოებაში ყოველმხრივ დადებითად ცნობადი ხარ,” – განმარტავს ის.

მომავლის გეგმები

ბიზნესის გაფართოება და მეტი ადამიანის მომსახურება ნარგოს მთავარი მიზანია. “რა თქმა უნდა, ვგეგმავ გაზრდა-გაფართოებას. მინდა ბევრი ‘ნარგოს ბუტიკი’ იყოს და კიდევ უფრო მეტი კმაყოფილი მომხმარებელი გვყავდეს,” – აცხადებს ის.

 

რჩევები დამწყები მეწარმეებისთვის

ნარგოს რჩევა დამწყები მეწარმეებისთვის მარტივი და შთამაგონებელია: “ქალები ყველაზე ძლიერები ვართ. მთავარი მონდომებაა და ყველაფერი მარტივად გამოდის. აუცილებლად უნდა მივცეთ თავს იმ ყველაფრის უფლება, რასაც ოცნების დონეზე გავიფიქრებთ. მთავარია, ზუსტად ვიცოდეთ რა გვინდა. ყველა ოცნება ასრულებადია!”

ნარგო ბექირიშვილის ისტორია კიდევ ერთხელ ადასტურებს, რომ საყვარელი საქმიანობის პროფესიად ქცევა და მომხმარებელზე ორიენტირებული მიდგომა წარმატების საწინდარია ბიზნესში.